As cinco claves de Rueda para unha lexislatura con grandes investimentos industriais 

Un compromiso coa transparencia e co futuro. Esa mensaxe agromou este mércores na presentación do Atlas Galego da Empresa Comprometida, que reuniu en Santiago a académicos, empresarios, directivos, responsables de sostibilidade e representantes institucionais para coñecer o avance das empresas galegas na súa relación co medio ambiente, as persoas, a contorna e o bo goberno. Na cuarta edición, o esixente escrutinio impulsado por Economía Digital Galicia congregou a máis participantes ca nunca, 80 empresas que decidiron facer transparentes os seus datos para a elaboración do estudo.

Tomando en consideración os temas analizados, non foi raro que no acto se abordaran tanto cuestións do presente coma de futuro. Como dixo o editor do Grupo Economía Digital, Juan García , o Atlas “fálanos do compromiso dun grupo moi significativo das nosas empresas con aqueles valores que consensuamos e que marcan o camiño cara a unha sociedade máis sostible, consecuentemente máis responsables con nós mesmos e coas xeracións futuras”.

A consolidación dunha iniciativa que naceu nun momento de crise polo impacto do Covid permítenos agora coñecer o progreso das empresas galegas nun período de fonda transformación, no que se suman outros valores aos ligados a produtividade e rendibilidade, como son a sostibilidade, a transparencia ou o impacto positivo sobre o territorio e as persoas. O Atlas lémbranos cada ano que non só son elementos dunha empresa responsable, senón auténticos vectores de competitividade.

Esta aposta das empresas galegas non pasou desapercibida para Alfonso Rueda, quen aplaudiu a aposta por medidas que beneficien tanto ao medio ambiente como ás persoas, xa que esta tarefa “marca o desenvolvemento industrial dos territorios e, polo tanto, tamén de Galicia”. O líder autonómico presidiu o acto. A pouco máis de tres semanas da súa toma de posesión como titular do Goberno galego, o dirixente pontevedrés tamén falou de futuro e compromiso. Do seu como presidente da Xunta.

Colaboración con empresas

Os catro anos que ten por diante Galicia serán claves na transformación do tecido produtivo, xa que deben servir para consolidar os grandes proxectos vinculados aos fondos Next Generation e a transición xusta en Meirama e As Pontes, onde pecharon as térmicas de Naturgy e Endesa. Haberá ainda máis iniciativas. Rueda asegurou que será unha lexislatura para facer realidade a confianza que o Executivo galego deposita na colaboración público-privada.

O presidente en funcións aludiu á entrada en funcionamento do fondo público-privado que anunciou no debate sobre o estado da autonomía e tamén das primeiras iniciativas da empresa mixta Recursos de Galicia . “Seremos estritos nos controis ambientais, pero favorables á instalación de empresas”, asegurou.

Beneficios no territorio

Precisamente, falando da entidade dirixida por Emilio Bruquetas, sinalou que un dos elementos que impulsará tradúcese en que os proxectos empresariais xeren beneficios para o territorio no que se asentan, precisamente un dos valores que analiza o Atlas de Economía Digital Galicia.

Rueda lembrou que a Xunta sempre se caracterizou por ser unha “administración amigable” coas empresas, ás que pediu que manteñan o seu papel para “mover a economía e mellorar as condicións de vida das persoas e do territorio”.

Unha cuestión de confianza

“Teño moita confianza no sector empresarial galego”, subliñou o presidente da Xunta en funcións. Tamén destacou o carácter familiar de boa parte do tecido produtivo de Galicia e como algunhas destas empresas familiares se convertiron en grandes empresas. “Comezan como unha familia e nunca perden esa esencia”, subliñou.

Esta confianza convence a Rueda de que o papel da administración é acompañar as iniciativas e crear as condicións necesarias para que se desenvolvan. “A vida económica e a vida no territorio teñen que ver coa economía” e son as empresas quen a move e quen “a fan funcionar”, sinalou.

Contra os prexuízos

Se a súa posición a favor da constitución de empresas era clara, a súa mensaxe tamén foi contundente fronte ao que cualificou de rexeitamento “sistemático” e “por se acaso” aos proxectos. “A posición da oposición inicial e sistemática, que se fai para alimentar os prexuízos, non nos leva máis que ao empobrecemento”, aseverou Rueda no medio da polémica sobre a fábrica de fibra téxtil que pretende construír a celulosa portuguesa Altri en Palas de Rei.

Engadiu que esta postura de rexeitamento “só serve para paralizar o progreso económico”, advertindo que se trata dun efecto non desexado, pois xera unha reacción en cadea que vai alén dunha única iniciativa industrial. “Uns procesos dependen dos outros”, advertiu.

Confianza, si. Control, tamén

Partindo desta idea, Rueda defendeu os controis técnicos e ambientais realizados pola Xunta, querendo dicir que un proxecto avalado polo Goberno galego implica que superou rigorosas avaliacións ambientais. “Ningunha administración é máis rigorosa e garantista que a galega”, concluíu.

Por iso, pediu aos cidadáns que entendan que estamos nun momento de “aproveitar as oportunidades” “Se non as aproveitamos nós, irán a outro sitio”, dixo o dirixente autonómico. A continuación expresou un desexo de futuro, buscar sempre o “progreso” para non ter que mirar atrás e “buscar culpables”.